cognizancejournal.com Jaymart R. Famor et al, Cognizance Journal of Multidisciplinary Studies, Vol.4, Issue.11, November 2024, pg. 305-319 (An Open Accessible, Multidisciplinary, Fully Refereed and Peer Reviewed Journal) ISSN: 0976-7797 Impact Factor: 4.843 Index Copernicus Value (ICV) = 77.57 ©2024, Cognizance Journal, ZAIN Publications, Fridhemsgatan 62, 112 46, Stockholm, Sweden, All Rights Reserved 305 KARANASAN NG MGA MAG-AARAL NG SENIOR HIGH SCHOOL SA PAGGAMIT NG ARTIFICIAL INTELLIGENCE Jaymart R. Famor DepEd Biliran – Caibiran National High School famorjaymart@gmail.com Frallyn Candido DepEd Biliran – Naval National High School fralyn.candido@gmail.com Dr. Gregg O. Siat Biliran Province State Univeristy, Naval, Biliran, Philippines greggsiat@gmail.com DOI: 10.47760/cognizance.2024.v04i11.018 Abstrak: Ang pag-aaral ay naglalayong tuklasin ang karanasan ng mga mag-aaral at mga hamon sa paggamit ng artificial intelligence. Ito ay isinagawa sa mga mag-aaral na gumagamit ng artificial intelligence sa Senior High ng Caibiran National High School, Caibiran, Biliran. Ang pag-aaral ay gumamit ng deskriptibong phenomenological na disenyo upang sagutin ang mga layunin na nakuha mula sa mga kalahok sa panayam na isinagawa para sa mahalagang nilalaman ng pag-aaral. Ang mga natuklasan sa mga karanasan ng mga mag-aaral sa paggamit ng Artificial Intelligence (AI) ay kinabibilangan ng: napapadali ang mga gawain; mayroong tama at maling impormasyong naibibigay; nakatutulong sa pagkakaroon ng mataas na marka; at maaaring kausapin sa pamamagitan ng live chat. Ang mga hamon sa paggamit ng Artificial Intelligence (AI) ay kinabibilangan ng: hindi ganap na naiintindihan kaagad ng AI ang tanong o mga hinihinging kasagutan; dumidepende at umaasa na lamang sa paggamit ng AI; at nakakaapekto sa kakayahang magbasa at umunawa. Sa mga pamamaraan kung paano nalalagpasan/ nakakayanan ang mga hamon sa paggamit ng Artificial Intelligence ay mayroong dalawang resulta: paggamit ng tiyak at simpleng mga salita upang makuha ng AI ang buong ideya ng tanong; at paglimita o pag-iwas sa paggamit ng AI. Sa pagpapalakas o pagpapatibay naman sa paggamit ng Artificial intillegence naman ay may mga pamamaraan na inirekomenda: maaaring magpanukala ng mga polisiya sa paggamit ng artipisyal na katalinuhan; at maaaring gamitin ang AI sa mas malawakang pagkatuto. Ayon sa mga resulta ng pag-aaral, inirerekomendang gumawa ng mga patakaran upang mapangasiwaan ang paggamit ng AI sa paaralan. Kailangan ding palawakin ang kaalaman ng mga mag-aaral sa AI kasama ang mga benepisyo at limitasyon nito. Patuloy ang pagbabago sa ating panahon kung kaya’t nararapat na ating tanggapin at yakapin ang mga pagbabagong ito bagamat mayroong mga negatibong epekto ito sa ating paaralan.