1 PURATAN CHHATRA MILAN EVAM GURUJAN (SH. BABU RAM SHUKLA EVAM SH. MADAN MANOHAR LAL MISRA JI) SAMMAN SAMAROH CANE GROWERS NEHRU SNATAKOTTAR MAHAVIDYALAY GOLA GOKARANNATH (JANPAD LAKHIMPUR-KHERI), U.P. 20 OCTOBER, 2013 Shraddheya guruvar Shri Babu Ram Shukla evam Shri Madan Manohar Lal Misra ji, Adarneeya Dr. Mool Chand Misra, Mahavidyalaya ke Pracharya Dr. Amol Kumar Singh evam anya Pradhyapak gan, Samast priya sahpathi-gan evam anya sabhi upasthit Mahanubhav ! Is pavan bhumi par aaj ham sabhi ka ek lambe antral ke paschat punermilan sambhav ho pa raha hai. Yeh ishwar ke kripa he hai evam hamara saubhagya hai ki ham abhi tak is pavan vela ko avalokit kar pa rahe hain. Na jane kitne hee hamare – apke aneko priya jan, sahpathee-gan eavm gurujan ab tak kaal ke ateet mein sama chuke hain. Upasthit jan-samooh mein katipay aise bhi sajjanvrind ho sakte hain jinase panch dashako se bhee lambe antraal ke paschat punermilan sambah ho pa raha ho. Jin sahpaathiyon ke naam pate meri smaran-shakti mein aa sake unse hee sampark kiya ja saka hai. Ek sahpaathi Shri Shiva Shankar Lal Shukla, nivasi Gharthaniya kee prabal ichha apporna hee rah gayee ki unke antim samay mein hee meri – unkee kabhee bhent ho sakatee. Is uddharan kee punaravritti na ho isliye yeh Punermilan sheeghrata mein hee sampann kiya ja raha hai. Ateva, iske sampann karne mein yadi koi trutian rah gayee hon to unkee andekhee karte huye punermilan ka aanand lene kee kripa karen. Aiye ham sabhi yeh sankalp bhee lein ki punermilan ka yeh deep nirantar prajjwalit hota rahe. Yeh kaal hee batlayega ki hamare madhya ke kin mahanuvhavo ko bhavishya mein aise karyakramon mein apnee sahbhaguita karne ka su- avsar prapta ho sakega? Adarneeya gurujano ka samman karne kee meri prabal ichha aneko varshon se thee kintu, samyabhav-vash, evam praayah videshon mein karyarat hone se yeh karyakram pahle nahee sambhav ho saka. Isee madhya, aneko guruvar bhee saath chhodate rahe. Prathmik Pathshala ke mere do guruvar Shri Mohammad Siddiq evam Bhallia Buzurg nivasi Shri Mohammad Walisher Khan ka abhee kuchh varshon poorva hee nidhan hua. Ham sabhee ne praayah ek lamba jeevan jiya hai jismein aneko utaar–chadhaav bhee aye honge. Ateet ke kriya-kalapon kee vyakhya karte-karte ek lamba samay nikal jayega. 28 August, 1962 se ab tak swadesh mein hee chaar pradeshon ke 9 vishwavidyalayon mein, videsh mein 4 mahadweepon ke 6 deshon mein sthit 7 vishwavidyalayon mein adhyapan karya kiya evam Europe mein 4 deshon ke 8 vishwavidyalayon mein shodh hetu karyarat raha. Desh–videsh mein prapta anekon aise sansmaran hain jo ki ullekhneeya hain. Samay seema ka dhyan rakhte huye matra katipay uddharan yahan prastut kiye jaa rahe hain. Inse mere atteet ke kriya-kalapon par ek sookshma drishti daali ja sakti hai. 1. Prathmik Pathshala, Semrai (1946-51) ke tatkaleen pradhanadhyapak Rasoolpur nivasi Shri Abdul Lateef jee ka saanidhya paya. Unhon mujhe Junior High School, Gola mein bhee padhaya. Varsha 1954 mein kachha 8 kee pareeksha mein vidyalay mein sarvochcha sthan prapta kiya.